0
0
30 ஆண்டுகளுக்கு மேலான அற்புதத்தாயின் போராட்டம் வெற்றி பெற்று உச்சநீதிமன்ற தீர்ப்புடன் விடுதலையாகியிருக்கிறார் பேரறிவாளன். பல இயக்கங்கள் கட்சிகளின் போராட்டங்கள், சட்டப்பேரவை தீர்மானங்கள், மாநில அமைச்சரவை தீர்மானங்கள், மாநில ஆளுநருக்கான அழுத்தம் என அத்தனையும் அத்தையும் கடந்து வலிமையான உறுதியான சட்டப்போராட்டத்தினால் இதை சாத்தியமாக்கியிருக்கிறது தமிழ்நாடு அரசு. தமிழ்நாடு மட்டுமின்றி உலகம் முழுவதும் உள்ள பல தமிழர்களும் இனிப்புகள் பறிமாறியும் பட்டாசுகள் வெடித்தும் இந்த விடுதலையை கொண்டாடி வருகின்றனர்.
இந்த விடுதலைக்காக பேரறிவாளனின் தாய் அற்புதம்மாள் பட்ட கஷ்டங்களையும், சந்தித்த சவால்களையும் சிந்திய கண்ணீர்களையும் அவ்வளவு எளிதாக வார்த்தைகளில் விவரித்துவிட முடியாது எனலாம். யூ-டியூப் சேனலின் பேட்டி ஒன்றின் போது, ‘biography படம் எடுக்க வேண்டும் என்றால் யாருடைய வாழ்க்கை வரலாற்றை வைத்து எடுப்பீர்கள்’ என்று கேட்கப்பட்டபோது அற்புதம்மாளின் போராட்டத்தை வைத்து எடுக்க வேண்டும் என்பது தன்னுடைய விருப்பமாக தெரிவித்திருந்தார் வெற்றிமாறன்.
அதுமட்டுமின்றி தனியார் ஊடம் ஒன்றி விருது வழங்கும் விழாவில் விசாரணை படத்திற்காக அற்புதம்மாளின் கைகளால் விருது வாங்கினார் வெற்றிமாறன். அப்போது. ‘இந்த படத்திற்கான இன்ஸ்பிரேஷன் எங்கிருந்து வந்தது’ என்ற கேள்விக்கு.. ‘life-ல இருந்துதான்’ என அற்புதம்மாளை கை காட்டினார் வெற்றிமாறன். மேலும், ‘நான் நிஜவாழ்க்கைல பாத்த மிகப்பெரிய ஹீரோ மற்றும் இன்ஸ்பிரேஷன் இவங்கதான். எந்த சந்தர்ப்பத்திலும் மனம் தளராம தொடர்ந்து போராடுறாங்க. இந்த போராட்டம் யாராலையுமே முடியாது. அவங்கள பாத்தா நமக்கே கஷ்டமாவும் டயர்டாவும் இருக்கும். சீக்கிரம அவங்க வெற்றியடைவாங்கன்னு நம்பிக்கை இருக்கு. எல்லாம் சரியா நடக்கும்!’ என்றும் கூறியிருந்தார் வெற்றிமாறன்.
அவர் கூறியதுபோல் அந்த அற்புதம் இன்று நிகழ்ந்துள்ளது எனவும் கூடிய வரையில் அற்புதம்மாளின் போராட்டங்களை இந்த சுபமுடிவுடன் படமாக்க வேண்டும் எனவும் தமிழ் சினிமா ஆர்வலர்கள் கோரிவருகின்றனர். அற்புதம்மாளின் கதாப்பாத்திரத்தில் நடிக்கும் நபரைக்கூட வெற்றிமாறன் தேர்வு செய்து வைத்திருப்பதாக முன்பு தகவல் வந்திருந்தது. இந்நிலையில் விடுதலை, வாடிவாசல் உள்ளிட்ட படங்கள் வெளியானவுடன் அற்புதம்மாளின் போராட்ட வாழ்க்கை படமாக்கும் வேலைகளை வெற்றிமாறன் தொடங்குவார் என்று கூறப்படுகிறது.
