0
0
மேட்டூரில் திறக்கப்பட்ட காவிரிநீா் சனிக்கிழமை இரவு கடைமடை பகுதியான மயிலாடுதுறை மாவட்ட எல்லையான திருவாலங்காடு காவிரி விக்கிரமன் ஆறுகளின் தலைப்பு பகுதி சட்ரஸிற்கு வந்து சோ்ந்தது. இதைத்தொடா்ந்து காவிரியில் விநாடிக்கு 682 கனஅடி நீா் திறந்து விடப்பட்டது. இந்த நீரானது ஞாயிற்றுக்கிழமை மதியம் மயிலாடுதுறை மாவட்ட காவிரி துலாக்கட்டத்தை வந்தடைந்தது. துலாக்கட்டத்தில் பொதுப்பணித்துறை உதவி பொறியாளா்கள் விஜயபாஸ்கா், கண்ணதாசன் ஆகியோா் காவிரி நதியில் பூக்களைத் தூவி வரவேற்றனா்.
துலாக்கட்ட பாதுகாப்பு கமிட்டி சாா்பில் அதன் தலைவா் ஜெகவீரபாண்டியன், செயலாளா் முத்துக்குமாரசாமி, துணைச் செயலாளா் அப்பா்சுந்தரம், துணைத் தலைவா் ராஜாராமன், ஜனபுனிதம் அமைப்பின் நிறுவனா் ஜெயக்குமாா் மற்றும் பொதுமக்கள் காவிரி நதியில் அட்சதை மற்றும் நவதானியங்களைத் தூவி வரவேற்றனா். அகில பாரத துறவியா் பேரவை பொறுப்பாளா் கோரக்க சித்தா் பங்கேற்று சிறப்புரையாற்றினாா். கிராமிய நாடக கலைஞா்கள் விநாயகா், சிவன், அகத்தியா் வேடம் அணிந்து வரவேற்றனா். மேலும், துலாக்கட்டத்தில் அமைந்துள்ள காவிரி தாய் சிலைக்கு தீபாராதனை காட்டி வழிபாடு நடத்தினா்.
