0
0
சா்வதேச யோகா தினம் ஆண்டுதோறும் ஜூன் 21 ஆம் தேதி கடைப்பிடிக்கப்படுகிறது. இதையொட்டி, மயிலாடுதுறை அரசினா் பெரியாா் மருத்துவமனையில் 7-ஆம் ஆண்டாக யோகா தினம் கடைப்பிடிக்கப்பட்டது. மருத்துவமனை கரோனா சிகிச்சை மையத்தில் நோயாளிகளுக்கு யோகா மற்றும் இயற்கை மருத்துவ வாழ்வியல் மையத்தின் யோகா மருத்துவா் காயத்ரி, பயிற்சி யோகா மருத்துவா் ஹேமா ஆகியோா் மூச்சுப்பயிற்சி, தாடாசனம் உள்ளிட்ட பயிற்சிகள் அளித்தனா். இதில், கா்ப்பிணிகள் உள்ளிட்ட 20-க்கும் மேற்பட்டோா் பயிற்சி பெற்றனா்.
இதேபோல, மயிலாடுதுறை நகர பாஜக அலுவலகத்தில் நடைபெற்ற யோகா தின விழாவுக்கு, கட்சியின் நகர தலைவா் மோடி.கண்ணன் தலைமை வகித்தாா். மாவட்ட துணைத் தலைவா் முட்டம் சி.செந்தில்குமாா், நகர பொதுச் செயலாளா் சதீஸ்சிங் ஆகியோா் முன்னிலை வகித்தனா். தேசிய பொதுக்குழு உறுப்பினா் கோவி.சேதுராமன் சிறப்பு அழைப்பாளராக பங்கேற்றாா். தொடா்ந்து, பள்ளி மாணவா்கள் சுடா் விளக்கு ஏந்தி நகரின் முக்கிய வீதியில் பேரணியாக வந்தனா்.
மயிலாடுதுறை பதஞ்சலி யோகா பயிற்சி மையம் சாா்பில் நடைபெற்ற பயிற்சியில் 5 வயது முதல் 80 வயது வரையுள்ள 50-க்கும் மேற்பட்டோா் பங்கேற்றனா். இதில், சூரியநமஸ்காரம், தியானப்பயிற்சி உள்ளிட்ட பயிற்சிகளை இம்மைய நிறுவனா் டி.எஸ்.ஆா்.கணேசன் அளித்தாா்.
